Liturgical Calendar

Daily Readings for Saturday July 11,2020

Gospel, യോഹ 7:14-24 : പുറമെ കാണുന്നതനുസരിച്ച് വിധിക്കരുത്

തിരുനാള്‍ പകുതിയായപ്പോള്‍ ഈശോ ദേവാലയത്തില്‍ ചെന്നു പഠിപ്പിച്ചുതുടങ്ങി. ഒന്നും പഠിച്ചിട്ടില്ലാതിരിക്കേ, ഇവന് ഇത്രയും അറിവ് എവിടെനിന്നു കിട്ടി എന്നു പറഞ്ഞ് യഹൂദര്‍ വിസ്മയിച്ചു. ഈശോ അവരോടു പറഞ്ഞു: എന്‍റെ പ്രബോധനം എന്‍റെ സ്വന്തമല്ല, എന്നെ അയച്ചവന്‍േറതത്രേ. അവിടത്തെ ഇഷ്ടം നിറവേറ്റാന്‍ മനസ്സുള്ളവന്‍, ഈ പ്രബോധനം ദൈവത്തില്‍നിന്നുള്ളതോ ഞാന്‍ സ്വയം പറയുന്നതോ എന്നു മനസ്സിലാക്കും. സ്വമേധയാ സംസാരിക്കുന്നവന്‍ സ്വന്തം മഹത്ത്വമന്വേഷിക്കുന്നു; എന്നാല്‍, തന്നെ അയച്ചവന്‍റെ മഹത്ത്വം അന്വേഷിക്കുന്നവന്‍ സത്യവാനാണ്. അവനില്‍ അധര്‍മ്മമില്ല. മോശ നിങ്ങള്‍ക്കു നിയമം നല്കിയില്ലേ? എന്നിട്ടും നിങ്ങളാരും നിയമം പാലിക്കുന്നില്ല. എന്തുകൊണ്ടാണ് നിങ്ങള്‍ എന്നെ കൊല്ലാന്‍ അന്വേഷിക്കുന്നത്? ജനക്കൂട്ടം പറഞ്ഞു: നിനക്കു പിശാചുണ്ട്. ആരാണു നിന്നെ കൊല്ലാന്‍ അന്വേഷിക്കുന്നത്? ഈശോ പ്രതിവചിച്ചു: ഞാന്‍ ഒരു പ്രവൃത്തി ചെയ്തു. അതില്‍ നിങ്ങളെല്ലാവരും ആശ്ചര്യപ്പെടുന്നു. മോശ നിങ്ങള്‍ക്കു പരിച്ഛേദനനിയമം നല്കിയിരിക്കുന്നു. വാസ്തവത്തില്‍, അതു മോശയില്‍നിന്നല്ല, പിതാക്കന്‍മാരില്‍നിന്നാണ്. അതനുസരിച്ച്, സാബത്തില്‍ നിങ്ങള്‍ ഒരുവന് പരിച്ഛേദനം നടത്തുന്നു. മോശയുടെ നിയമം ലംഘിക്കാതിരിക്കുന്നതിന് ഒരുവന്‍ സാബത്തുദിവസം പരിച്ഛേദനം സ്വീകരിക്കുന്നെങ്കില്‍, സാബത്തുദിവസം ഒരു മനുഷ്യനെ ഞാന്‍ പൂര്‍ണമായി സുഖമാക്കിയതിന് നിങ്ങള്‍ എന്നോടു കോപിക്കുന്നുവോ? പുറമേ കാണുന്നതനുസരിച്ചു വിധിക്കാതെ നീതിപൂര്‍വം വിധിക്കുവിന്‍.


Reading 3, 2 കോറി 11:1-6 : മിശിഹായുമായി വിവാഹനിശ്ചയം ചെയ്യപ്പെട്ടവര്‍

എന്‍റെ അല്പം ഭോഷത്തം നിങ്ങള്‍ സഹിക്കുമല്ലോ. നിങ്ങള്‍ ഇപ്പോള്‍ത്തന്നെ എന്നെ സഹിക്കുന്നുണ്ടല്ലോ. എനിക്കു നിങ്ങളോട് ദൈവികമായ അസൂയ തോന്നുന്നു. എന്തെന്നാല്‍, നിര്‍മ്മലയായ വധുവിനെ അവളുടെ ഭര്‍ത്താവിനെന്നപോലെ, നിങ്ങളെ മിശിഹായ്ക്കു സമര്‍പ്പിക്കേണ്ടതിന് അവനുമായി നിങ്ങളുടെ വിവാഹനിശ്ചയം ഞാന്‍ നടത്തി. എന്നാല്‍, സര്‍പ്പം ഹവ്വായെ തന്ത്രപൂര്‍വം ചതിച്ചപോലെ, നിങ്ങളുടെ ചിന്തകള്‍ മിശിഹായിലുള്ള ലാളിത്യത്തിലും വിശുദ്ധിയിലുംനിന്നു വ്യതിചലിപ്പിക്കപ്പെടുമോ എന്നു ഞാന്‍ ഭയപ്പെടുന്നു. എന്തെന്നാല്‍, ഞങ്ങള്‍ പ്രസംഗിച്ചതല്ലാത്ത മറ്റൊരു ഈശോയെ ആരെങ്കിലും വന്നു പ്രസംഗിക്കുകയോ നിങ്ങള്‍ സ്വീകരിച്ചതല്ലാത്ത മറ്റൊരു ആത്മാവിനെ നിങ്ങള്‍ സ്വീകരിക്കുകയോ നിങ്ങള്‍ കൈക്കൊണ്ടതല്ലാത്ത മറ്റൊരു സുവിശേഷം നിങ്ങള്‍ കൈക്കൊള്ളുകയോ ചെയ്താല്‍ നിങ്ങള്‍ അനായാസം അതിനോട് ഇണങ്ങിച്ചേരുന്നുണ്ടല്ലോ. ഈ പ്രമുഖ ശ്ലീഹന്മാരെക്കാള്‍ ഒട്ടും കുറഞ്ഞവനല്ല ഞാന്‍ എന്ന് ഞാന്‍ കരുതുന്നു. പ്രഭാഷണചാതുര്യത്തില്‍ ഞാന്‍ പിന്നാക്കമായിരിക്കാം; എന്നാല്‍ അറിവിലല്ല. എല്ലാ കാര്യങ്ങളിലും എല്ലാ വിധത്തിലും ഇതു നിങ്ങള്‍ക്കു വെളിപ്പെടുത്തിയിട്ടുണ്ടല്ലോ.